Hoi ihr alli

Au hüt bin ich wieder im «Zambo»-Studio bim Patrick live i de Sändig.😁

Hüt chönd ihr nach de Sibni is Studio aalüte uf d' Nummere

0848 00 99 00. Ich bruuch für mini Gschicht

🍈 e Fantasiepflanze

🐜 dere Pflanze ire beschti Fründ

Und für morn, für de Ziischtig, chasch ois ab hüt Abig am Sibni dini Ideä uf de Telefonbeantworter (0848 00 23 27) schwätze. Bitte hinterlaan det es din Name, dis Alter und

📡 es Grüsch und

🦃 es (frei erfundnigs) Tier us de Zuekunft, wo das Grüsch macht.

Ich bin scho cheibe chribbelig was mich hüt und morn z'Abig erwartet.

Bis graaaad,😝

De Michael

Endli endli endli dörfi wieder go Gschichte verzelle, juppiiii! Kennsch mi no? I bi «de Michael». I bi als Chind mol inen Zaubertrank inegheit und sitt do sprudlets numeno us mir use. Und i liiiiiebs, Gschichte usem Stehgreif z'verzelle! Live bi «Zambo» im Radio! 😁😁😁

Am Sunntig fangemer mit de neuschte Staffle ah (scho di füfti imfall!) und für da bruchi dini Hilf. Ide Gschicht söll vorcho...

🚨 Öppis Verbotnigs

🙋 e Person, wo das Verbotnige macht

🏞 und en Ort, wo das Verbotnige passiert

Hesch Ideä?

I freu mi mega uf din Kommentar! Und no meh freui mi druff, wieder Gschichte z'erfinde mit dine Ideä!

Sodeli, ez gangi nochli go herbschtschlöfle (nöd winterschlöfle😉), demits denn am Sunntig so richtig us mir usesprudlet! Bis deeenn! 😊

De Michael

Sali mitenand!👋👋👋👋

Hend ihr en schöne Mittwuchnomitag gha? Ich bi denn schön is Schwitze cho… weg dä 🌞 natürli, aber au weg eure Vorschläg für hütt z’Obig. Ich hoffe, ich chume denn nöd is Staggele, wenni ab em 7ni bi Zambo im Radio wieder e Gschicht erfind!🐪

Morn am Dunnschtig chumi im Fall nomol! Du chasch jetzt scho überlege, mit was du mit wottsch usäfordere. Morn söll's i dä Gschicht goh um:

äs Tier 🐭🐰🐒🐔🐥🦆

und ä Saumode oder en Tick

Hesch scho ä Idee? Chasch morn i d'Sändig aalüte uf 0848 00 99 00. Und villicht bisch so nett und schriiibsch do une im Kommentar scho, was es chönti sii... denn chani chli besser schlofe.

Tschühüsss😊

de Michael

Sali mitenand

Freihaa, das wärs gsi hüt, oder?

Aber wahrschinli hesch du hüt Schuel gha und au für mich heisst's hüt wieder ganz vill hirne und für dich e cooli Gschicht us em Bode stampfe. Hüt ab em sibni bini wieder mit de Anna im Radiostudio und verzapf hoffentli wider öpis Luschtigs.🤣

Und du chasch während em Zuelose hüt Abig scho fäng mal überlege, was es morn für e Geschicht söll gä. Ich bruche vo dir für de Mittwuch:

🤡En witzige Name

💂En ussergwöhnliche Bruef

🕴Es Gheimnis, wo die Person hät

Schrib une i d’Kommentär, was dir alles für Idee chömed.

Und wenn dini Finger nöd möget schriebe (es isch immer no sooo heiss!), dänn lüt eifach uf euse Telefonbeantworter ah und gib mir dini Idee det dure. D’Nummere isch 0848 00 23 27. Ich bin gspannt wie en Sunneschirm, was für Begriff du ischicksch!🤗

Schwitzigi Grüess

De Michael

Hoi mitenand

Läck, isch das heiss. Ich hoff du hesch dich hüt nach de Schuel noimets chli chöne go abchüele. Ich gumpe also vilich nacher scho no schnell i de Brunne da vor em Zambostudio.😎

Zersch heisst's für mich aber schaffe oder besser gseit: Gschichte verzelle.

Hüt z'Abig chasch mer live id Sendig aalüte und mir drüü Grüsch duregää. Schalt's Radio ii am sibni, machs Telefon parat und wenn d'Anna de Startschuss git zum aalüte, den wählsch 0848 00 99 00!

Aber hey, das isch nonig alles! Schliesslich bin ich die ganze Wuche am Start. Und für morn bruuch ich wieder drüü Sache vo dir:

⛹️E lustigi Sportart

🐨Es Maskottchen oder en Glücksbringer

🏆De Star vo dere Sportart

Schriib's mer doch id Kommentär, was dini Vorschläg sind. Oder wenns der z'heiss isch zum schriibe, chasch mer's au ufde Telefonbeantworter schwätze und zwar unter 0848 00 23 27. Ich froi mi zum mit dine Begriff e spassigi Gschicht z'erfinde.

Liebi Grüess,

De Michael

Hoi mitenand,

Känneder mich no? Ich bis, de Michael. Oiä (so hoff ich doch 😊) Lieblingsgschichteverzeler. Abem Sunntig dörfich wieder live im Zambo Gschichte verzelle. Ich freu mi scho wie veruckt!

Und natürlich bruch ich au das mal wieder dini Hilf!

Jede Tag liferisch du mir Sache, wo ich i mini Gschicht chan iiboue.

Als erschts hett ich gern:

🍎e Märlifigur

🎩es speziells oder komischs Chleidigsstuck

🌇irgende Stadt irgendwo

Schriib mir dini Vorschläg umbedingt une id Kommentär!

S Zamboteam wählt dänn ei Kombination us. Ich weiss natürlich vo nüüt, schliesslich mun ich mir die Gschicht mit dine Wörter ganz spontan und live am Radio us de Finger (oder besser gseit us em Hirni 🙃) suuge.

Ich bi sicher, es wird au das mal wieder luschtig, schnäll, komisch, verruckt, myschteriös und fantastisch - alles isch möglich, will bi mir isch schliesslich Alles e Gschicht!

Bis uf sehr bald!

De Michael