Hey zäme!
Ich weiss nöd ob ihrs wüssed, aber de Clown Dimitri esch jo i de Nacht vom Dsiischtig uf e Mittwuch im Alter vo 80gi gschtorbe.
Mich het das irgendwie mega berüert... De Dimitri esch jo eine vo de bedüütendschte Schwiizer Clowns gsi... Ich han ihn zwar nie live gseh, han aber vil vo ihm ghört und kenne Lüüt, wo ihn kännt händ. Irgendwie machts mich scho rächt truurig, dass d'Schwiiz so en berüemte Clown verlore het...
Wie esch das bi euch? Händ ihr de Dimitri scho mol live gseh? Oder im Fernseh? Händ ihr in (wie ich) en guete Clown gfunde?
Nimmt mich wunder... ;o)
Freue mich mega uf euchi Kommentär!
Euchi torrepellice

Hey zäme!!!
Ich han hött ergendwie en Pächstag: am Morge i de Schuel esch (usnahmswiis) alles perfekt gloffe. Aber wo ih am Mettag vo de Trompeteschtond heicho ben, ben ih met em Trottinett voll i en Gartehaag ine gfaare ond han en mega grossi Büüle am Chopf ond öberall Schörfige.
Händ er au scho mol so en blöde Onfall gha?
Händ er mer en Tipp was ich cha mache, dass es mer ned eso langwiilig esch, well ich jetzt es Ziitli deheime sii muess?
Ich fröie mech of alli Tipps ond Gschechte do onde be de Kommis!!!
Liebi Grüess, Torre Pellice

Hoi Zäme!
Höt ben ich am Zuekonftstag enere Bäckerei gsi met minere Fröndin. Mer händ am 5.30 Uhr (am Morge) müesse e de Bäckerei gsi... Horror för en Morgemuffel wen ich...
Das es no so früe esch, hani schlossändlech gar ned gmerkt, es het nämlech Emmer öppis z tue gäh! Mer händ töffe Brötli met Sesam ond Mohn bestreue, Grittibänze bache, Sandwiches beschtriche ond ganz vel me! Es esch en mega coole Tag gsi!
Jetzt wet ich natürech vo euch wösse, wo er gsi send, öb ers au so cool gha händ ond öb er au scho mol enere Bäckerei gsi send oder au scho mol so früe händ müesse ufschto???
Liebi Grüess,
Torre Pellice