Hoi zämä!🙃
Ig bi grad nu chli dürenang … aber vor ungefähr einere Stund isch mir öppis richtig heftigs passiert. Davo möchtig öich itz chli verzeue. Der Blog isch chli länger, aber äs würd mi sehr fröiä, wenn dir fertig läset.
Ig bi itz ja ir 7. Klass und ga ids Gymnasium Lerbermatt u hüt si Maturpräsentatione gsi. Äs het ungefähr äm 10:30 agfange (ig weis nüme genaui Uhrzite aber schetzigswis). Mir si im Englisch gsi und plötzlech isch es dunku worde - Stromusfau. Äs het bi üs so Brandschutztüre wo mit Strom ufghaute werde, u wenn der Strom usfaut gheie si zue. Mir hei üs chli gruselet u mir isch chli unwou gsi, wüu mir sozege "igsperrt" si gsi, aber d Lehrer hei üs beruiget u hei gseit das d Maturpräsentatione viu Strom bruche, u wenn mä d Türe nid pschliesst chame se ohni Schlüssu öffne. Wenn die Türe zuegheie knauts u mir hei üs immer chli erschrocke. Aber wie gseit, d Lehrer hei üs beruigt und mir hei üs nid viu derbi dänkt - Stromusfau het ja fasch jede schomau gha - mir hei sogar nu chli Witzli drüber gmacht. Doch denn het öpper gseit "Oha d Polizei" - mir si aui ufgsprunge und zum Fänster gloffe. Und tatsächlech, ufem Pouseplatz si mehreri Polizeioutos und äs Zivilschutzouto gstande. Aber d Lehrerin isch nu da gsi und het erklärt das es eifach ä obligatorischi Massnahm ds d Polizei chunt wenns Stromusfau git, wüu gägäüber vor Schu isch mau äs Spitau gstande, u wenns dört ke Strom me het mues mä natürlech sofort handle. Auso si mer eifach abe i Computerrum, wüu mir dört Französisch hätte gha. Mir isch im Nachhinein ufgfaue, dass d Kompis wägem Stromusfau eh nid gange wäre, aber egau. Der Lehrer isch nid da gsi, obwou d Stund sit 5 Minute het agfange. Aso hei mir chli dürenang gret - doch plötzlech ghöre mir öppis und äs Meitli seit so "Sch!". Uf ei Schlag si mir aui stiu gsi. Für ca. 2 Sekunde het sech keine bewegt oder öppis gseit: Mir hei nur die ohrebetöibendi Sirene ghört, wo plötzlech agfange het. Uf einisch hets gliche Meitschi gseit: "Okey." und mir si us üsere Schockstarri erwacht. Mir hei nur üses Franzzüg packt und si use - zum Glück isch ds Zimmer direkt näbem Houptigang gsi. Äs isch niemer grennt oder het umegschroue oder so, aber mir hei aui ä Schreck gha. Dusse gseh mir üsi Klasselehrerin und üsi Englischlehrerin mit besorgter Mine stah. Mir hei se gfragt, was los isch - der Velochäuer het brönnt.. Mir hei gfragt, ob mir numau ufe ids Klassezimmer dörfä üses Züg ga hole. Mir hei dörfä, wüus i dem Teil nid brönnt het. Mir hei nu ä anderi Klass useglah und si när sofort ufegange, so inere Mischig us renne und loufe. Womer dobe si gsi het ändlech dä Alarm ufghört. Mir hei so schnäu wies geit aues zämägsammlet und si los. Ig ha natürlech nümme mis Ämtli gmacht, und mi Ämtlipartner logischerwis o nid. Ig bi froh, das mir numau hei ufedürfe, wüu ig ha aues dört gha: Jagge, Schlüssu, Bössabi, Handy (Ds isch natürlech völlig zwöitrangig, vorauem ds Handy, aber süsch hätti haut niemer chönne erreiche). Mir hei düre Hinterusgang usemüesse. När hani minere Mueter aglüttet und si het mi abghout.
Sowit ig weis, hets kei verletzti gä, aber der Velochäuer het brönnt. Schinbar isch i der Aula öppis explodiert.
So, das wär die Gschicht gsi… Mir hei üs zwar gfröit, dass mir Schufrei hei, aber äs wär definitiv aune Beteiligte lieber gsi, äs wär nid passiert..
Ig danke öich fürds Läse vo däm ä chli ärnschtärä Blog!🙂
Ig verabschide mi hie!
Dragongirl alias Livia